امي و خالتي
على البيت علطول
سامية
طيب ادخلي غيري هدومك وكلي وابقي شطبي المواعين اللي في الحوض جوه دي
إسراء
حاضر ياماما ده انا لسه داخلة من الباب يعنى ارتاح حتى من السلم
نوال
هو صحيح يا اسراء هيبقا عندكم دراسة في رمضان ده بعد بكرة
إسراء
ايوه طبعا ياخالتو في والامتحانات هتبقا بعد العيد علطول وهند كمان المفروض انها هتروح دروس
اه ياحبة عيني الثانوية العامة مخلياها مش بتقوم من على الكتاب بتاكل الكتب اكل
سامية
اهو كده كويس برضو يانوال خليها تاكل الكتب وتعدي السنه دي بقا دي المفروض تبقا في تالتة كلية بدل ماهي بتاخد السنه بسنتين دي بقالها خمس
سنين في ثانوية عامة
نوال
الله قصدك ايه ياسامية ان بنتي فاشلة مانتي عارفه هي كانت بتسقط وبتعيد السنه ليه ماهو من المخفي ابوها اللي كان بيعاملني انا وهي ولا العبيد لحد مأثر على نفسيتها ياعين امها
خلاص ياخالتو متزعليش ان شاء الله هتتوفق السنة دي وتدخل كلية محترمة
نوال
سمع منك ربنا يا اسراء
إسراء
طيب انا داخلة اغير هدومي
ودخلت الاوضة بتاعتي اللي هند بنت خالتي قاعده معايا فيها وكانت بتتكلم في التليفون واول ماشافتني قالت
هند
طيب طيب هكلمك بعدين يلا سلام دلوقتي انتي جيتي يا اسراء
إسراء
هند
ما انا اااا ااه كنت بذاكر مع واحدة صاحبتي في التليفون وكنت بسالها عن حاجه كده في التاريخ
إسراء
ااه طيب ربنا يوفقك اتجدعني بقا السنة دي عشان تنجحي وتدخلي الجامعة
هند
اديني بعمل اللي عليا اهو يا بنت خالتي هو انتي هتنامي ولا هتعملي حاجة
بتسالي ليه انتي عايزة حاجة ولا ايه
هند
ها انا لا لا ابدا اصلي لسه ورايا مذاكرة وخاېفة تطفي نور الاوضه عشان تنامي
إسراء
لا ياستي انا هاروح المطبخ اكل وبعدين اغسل المواعين وارجع اذاكر جنبك هنا
وسبتها وخرجت من الاوضه ومسكت تليفونها وقالت
هند
ايوه ياموحة معلش ياحبيبي قفلت في وشك السكة اصل بنت خالتي دخلت عليا وانا بكلمك
ااه ولا يهمك ياحبيبتي هو احنا كنا بنقول ايه بقا
ورجع بابا من برة وقال
إسراء رجعت ياسامية
سامية
اه ياجمال رجعت وبتغسل المواعين في المطبخ
جمال
مواعين ايه ياسامية البت في الجامعة يعنى المفروض ترجع وتشوف مذاكرتها واللي وراها تعمله مش تدخليها المطبخ تغسل وتمسح
سامية
جرا ايه ياجمال هو يعني لما بنتك تغسل الطبقين يبقا كده هنعطلها عن مذاكرتها وبعدين ده علام ليها امال لما تتجوز هتخلي جوزها يجبلها خدامة ولا ايه
وليه لا ومالو انا هتشرط على اللي يتجوزها انه يجبلها خدامة في البيت هو انا ليا غيرها يعنى دي بنتي دي تعيش ملكة في جوزها كده
وخرجت من المطبخ وبوسته وقولت له
ياحبيبي يابابا ربنا مايحرمني منك ابدا وطولي في عمرك يارب
جمال
حبيبت بابا انتي
سامية
ايوه ياختي ما انتي ملكيش الا ابوكي انما انا لا
إسراء
انتي حتة من قلبي ياماما انتي كمان والله
سامية
مباكلش من الكلام ده يلا ادخلي على المطبخ كملي المواعين ياقلب ابوكي
إسراء
حاضر ياماما عن اذنك يا بابا انا داخله المطبخ وسبتهم ودخلت وكل ده خالتي عماله تعوج في بوقها
جمال
خفي على البت ياسامية دي هتبقا دكتورة صيدلانية اد الدنيا انا داخل اوضتي
نوال
هو ايه ياختي ده والله ماحد ماهيبوظ البت دي غير جوزك ده يا سامية ياختي مرارتي اتفقعت منه
سامية
اعمله ايه بس يانوال ماهو اللي مدلعها كده
نوال
لا لا ده دلع ماسخ وبعدين بنتك لازم تتحجب ااه دي كبرت اهيه وانتي عارفة الحارة اللي احنا فيها كل واحد وواحدة بكلمة ومحدش بسيب حد في حاله
سامية
قطع لسان اللي يجيب سيرتنا بكلمة يانوال انا بنتي متربية
