انا بحب القطط

أنا بحب القطط جدا.. أو خليني أكون واضحة في كلامي أنا كنت بحب القطط وبعد اللي حصلي مع بوسي أخر قطة ربيتها قررت إني مش هربي قطط تاني.
انا عايشة في منطقة شعبية مع بابا وأخويا اللي ربنا يخليهم ليا بيصرفوا عليا وعلى علاجي .. أصلي قعيدة .
وماكنش في حاجة بتسليني غير التليفزيون وبوسي اللي كنت بعتبرها صحبتي اللي لما بكون متضايقه بتكلم معاها ولما باجي انام بلاقيها بتيجي تنام في حضڼي.
وفي يوم صحيت من النوم ملقتهاش موجودة جنبي ولا موجودة في البيت كله!.
فضلت أدور عليها ملهاش أثر وفضلت أكتر من أسبوع مش لقياها وقولت أكيد شافت باب البيت مفتوح وخرجت في الشارع ومش هترجع تاني.

يأست وزعلت بسببها جدا.. بقيت لواحدي .. بابا واخويا في الشغل طول اليوم وفي يوم التامن لقيتها.. أيوة بوسي رجعت.
في اليوم ده كنت نايمه بس بدأت أقلق بسبب هزة حسيتها جنبي على السرير فتحت عيني وانا بين الصحيان والنوم لقيت بوسي واقفة على طرف السرير وبتبص عليا!.
فرحت والنوم طار من عيني فضلت ابسبس لها بس ماكنتش بتتحرك ثابتة زي التمثال.. قربت ايدي منها بس قبل ما أوصل لدماغها نزلت هي من على السرير وجريت برة في الصالة.
كان صعب عليا انزل وراها خصوصا ان ضهري كان واجعني قولت لنفسي هنام وبكرة الصبح اكيد هلاقيها.. وبالفعل نمت.
شوفت كابوس مقبض جدا لقيت نفسي واقفة في مكان ضيق وحواليا مرايات كتير شايفه نفسي كل ما أتحرك حواليا.. بس إنعكاساتي في المرايات كانت ثابتة رغم اني بتحرك!.
وفجأة بدأت أشوف في مرايا منهم شخص جاي من بعيد وهو بيجري كان بيتحرك زي البلياتشو ولما قرب شوية اتأكدت بالفعل من لبسه انه بلياتشو او مهرج!.
كان لابس طاقية طويلة على راسه وكلها الوان كتير بس ايده ورجله لونهم إسود وعند رجله من تحت مخالب!.
مقدرتش اشوف ملامحه بسبب انه لما بدأ يقرب عليا حسيت ان عيني بتزغلل وبدأ ينادي عليا بصوت عالي فريدة .. يا فريدة!.
فتحت عيني وأول ما بصيت عند باب أوضتي ڠضب عني صړخت بصوت عالي ده لاني شوفته واقف بنفس هيئته مش واقف عند الباب لا كان واقف على الحيطة في الركن اللي فوق الباب!!.
_ ايه يا حبيبتي أنا أبوكي .. معلش صحيتك .. بس تعالي عايزك ضروري.
كان صوت بابا وبعد ما قالي الجملة دي خرج برة في الصالة وجوده خلاني أستريح لاني بعد ما سمعته الأراجوز او المهرج ده أختفى قعدت على الكرسي وبدأت أحركه وطلعت برة الصالة ..بس ملقتش بابا واقف ولا في اوضته واللي اكتشفته ان الساعة ١٢ بالليل وده الميعاد اللي هم بييجوا فيه.
فضلت انادي بابا .. يا بابا انت هنا.. لما خلصت الجملة دي سمعت صوت بوسي